電子咭片平台啟用鄧月平獲邀拍廣告

平時大家出席各種社交場合嘅時候，少不免都會同在場人士交換咭片。久而久之，堆積如山嘅咭片，往往會為大家帶嚟一連串嘅煩惱。

當年有份創辦「咭片皇」嘅鄭海名，最近就成立咗網上電子咭片平台「名片匯」。為咗加強宣傳效果，佢仲特別邀請咗Larine鄧月平，拍攝四套以唔同造型亮相嘅廣告片。

作為藝人嘅Larine，過往因為工作關係，經常都會收到大量嘅咭片。形容自己「大頭蝦」嘅Larine，諗返起昔日最初踏入社會工作嘅時候，其實連收咭片應有嘅禮儀都唔識。目前有份營運中醫診所嘅佢，有時亦會遇到手頭上唔夠咭片嘅情況。佢形容，能夠隨時更新個人資料嘅電子咭片平台，唔單止可以為大家嘅日常生活，帶嚟更多方便；同時亦可以為環保出一分力。

「名片匯」本身係一個免費平台。被問及會唔會對原有嘅咭片印刷業務造成影響，鄭海名就話會將長遠嘅目光，放喺數據庫方面。佢期望呢個電子咭片平台，日後隨住用戶數目增長，可以孕育出更多嘅商機。